"Мәңгілік даңқ" шеруі

           Өзен вокзалы ауданынан сап түзеген шеру Славский жағалауымен «Даңқ» мемориалына бет алды. Қаладағы кадет корпустарының, мектептердің оқушылары мен жоғары оқу орындарының студенттерінен, сондай-ақ кәсіпорындардың, мекемелер мен мемлекеттік органдар қызметкерлерінен, және де қарапайым қала тұрғындарынан құрылған шеру «Мәңгі алауға» жетіп гүл шоқтарын қойды.
          «Бұл күн аға ұрпақтың ерлігі дәріптелетін күн. Жүздеген ұлттың ұйыса жеткен жеңісінің нәтижесін кейінгі ұрпақ біз көріп отырмыз. Екінші Дүниежүзілік соғыс қай қазақстандықтың болмасын отбасын айналып өткен емес. Біріміздің атамыз, біріміздің әкеміз, енді біріміздің ағамыз қан майданда жан беріспей соғысты. Қазақстаннан 1,5 миллионнан астам әскерге шақырылып, олардың жартысы майдан даласында қаза тапты. 490 қазақстандық асқан ерлігімен көзге түсті. Олардың ішінде Әлия Молдағұлова, Мәншүк Мәметова сынды апаларымыз бен екі дүркін Кеңес Одағы Батыры атағын алған Талғат Бигельдиновтар болды. Соғысқа аттанған 180 мың шығысқазақстандықтың 83 мыңы қаза болып, 109 шығысқазақстандық Кеңес Одағы батыры атағына ие болды», - деді облыс әкімі Даниал Ахметов.
          Салтанатты шерудің соңы мерекелік концертке ұласты. «Даңқ» мемориалы жанында құрылған сахнада қаланың көркемөнерпаздар ұжымы концерттік бағдарламаларын көрсетіп, Екінші Дүниежүзілік соғыста қолданылған әскери техникалар көрмесі ұйымдастырылды. Сондай-ақ мерекелік шара қонақтарына «сарбаз ботқасы» таратылды. Кешкілік аталмыш мемориал маңында концерттік бағдарлама жалғасын тауып, соңы мерекелік отшашуға ұласты.